Azərbaycan News Agency

Avrodan istifadə edən 20 ölkənin mərkəzi bankı blok üzrə artım və inflyasiya proqnozlarının bir çoxunu yüksəltdi. Bu addım yaxın müddətdə faiz endirimlərinin yolunu bağlayır kimi görünür. AMB-nin açıqlamasında deyilir: “İdarəetmə Şurası bu gün AMB-nin üç əsas faiz dərəcəsini dəyişməz saxlamaq qərarı verib. Yenilənmiş qiymətləndirmə inflyasiyanın orta müddətdə 2% hədəfində sabitləşəcəyini təsdiqləyir”, və aşağıdakı məlumatlar təqdim olunub:

“Avrosistemin yeni proqnozlarına görə, ümumi inflyasiya 2025-ci ildə orta hesabla 2,1%, 2026-cı ildə 1,9%, 2027-ci ildə 1,8% və 2028-ci ildə 2,0% olacaq. Enerji və ərzaq istisna olmaqla inflyasiyanın 2025-ci ildə orta hesabla 2,4%, 2026-cı ildə 2,2%, 2027-ci ildə 1,9% və 2028-ci ildə 2,0% olacağı gözlənilir. 2026-cı il üzrə inflyasiya proqnozu yuxarı istiqamətdə yenilənib; bunun əsas səbəbi xidmətlər inflyasiyasının daha yavaş azalacağının gözlənilməsidir. İqtisadi artımın, xüsusilə daxili tələbin təsiri ilə, sentyabr proqnozları ilə müqayisədə daha güclü olacağı gözlənilir. Artım 2025-ci ildə 1,4%, 2026-cı ildə 1,2% və 2027-ci ildə 1,4% olaraq yenilənib və 2028-ci ildə 1,4% səviyyəsində qalacağı gözlənilir.”

Açıqlamada vurğulanır ki, AMB-nin İdarəetmə Şurası inflyasiyanın orta müddətdə 2% hədəfində sabitləşməsini təmin etməyə qətiyyətlə sadiqdir. “Münasib pul siyasəti mövqeyini müəyyənləşdirmək üçün Şura verilənlərə əsaslanan və iclasdan-iclasa yanaşmanı izləyəcək. Xüsusilə, faiz dərəcələri üzrə qərarlar daxil olan iqtisadi və maliyyə məlumatları, əsas inflyasiyanın dinamikası və pul siyasətinin ötürülməsinin gücü fonunda inflyasiya görünüşünün və ona dair risklərin qiymətləndirilməsinə əsaslanacaq. İdarəetmə Şurası əvvəlcədən müəyyən edilmiş faiz dərəcəsi trayektoriyasına bağlı qalmayacaq”, – deyə bildirilib.