Azərbaycan News Agency

Azərbaycan Respublikasının Prezidenti İlham Əliyev Birləşmiş Ərəb Əmirliklərinin Əbu-Dabi şəhərində Ermənistan Respublikasının Baş naziri Nikol Paşinyan ilə bir araya gəlib.

Tərəflər Amerika Birləşmiş Ştatlarının Prezidenti Donald Trampın ev sahibliyi və iştirakı ilə keçirilmiş Vaşinqton Sülh Zirvəsinin nəticələrinin icrasında əldə olunan irəliləyişi məmnunluqla qarşılayıblar. Həmçinin Ermənistan və Azərbaycan arasında normallaşma prosesinin ikitərəfli əsasda irəlilədilməsində müsbət dinamikanın qorunmasının vacibliyini vurğulayıblar.

Görüş zamanı İlham Əliyev və Nikol Paşinyan Azərbaycandan Ermənistana neft məhsullarının ixracına başlanmasından, eləcə də üçüncü ölkələrdən Ermənistana taxıl və digər malların Azərbaycan ərazisi üzərindən tranzit daşınmasından məmnunluqlarını ifadə ediblər. Bununla yanaşı, tərəflər ikitərəfli ticarətin və iqtisadi əməkdaşlığın genişləndirilməsi imkanlarının daha geniş şəkildə araşdırılması barədə razılığa gəliblər.