Azərbaycan News Agency

Birləşmiş Millətlər Təşkilatının (BMT) Fövqəladə Yardım üzrə Koordinatoru Tom Fletçer 2026-cı il ərzində həyat qurtaran yardım tədbirləri çərçivəsində 41,9 milyon insana yardım göstərildiyini və ümumilikdə 14 milyard dollar ianə toplandığını bildirib.

Tom Fletçer sosial media hesabında paylaşdığı açıqlamada bu il 87 milyon insanın həyatını xilas etməyi hədəfləyən planın sürət qazandığını, lakin qarşıda hələ uzun yol olduğunu qeyd edib. Koordinasiyalı humanitar yardım icmasına və dəstəkçilərə təşəkkür edən Fletçer prosesin radikal şəffaflıq prinsipi əsasında həyata keçirildiyini vurğulayıb.

Paylaşılan məlumatlara görə, qlobal humanitar yardım planı çərçivəsində tələb olunan ümumi maliyyə vəsaiti 24,9 milyard dollar müəyyən edilib, indiyədək isə 14,05 milyard dollar vəsait təmin olunub.