Azərbaycan News Agency

Bolqarıstanın Milli Üçtərəfli Əməkdaşlıq Şurası 2027-ci il üçün minimum əməkhaqqının artırılmasını nəzərdə tutan layihəni müzakirə edib. Layihəyə əsasən, 2027-ci il yanvarın 1-dən aylıq minimum əməkhaqqının 660 avroya, saatlıq minimum əməkhaqqının isə 3,88 avroya yüksəldilməsi təklif olunur.

Bolqarıstanın əmək və sosial siyasət naziri Nataliya Yefremova təklif olunan artımın ölkənin iqtisadi şəraiti və dövlət büdcəsinin imkanları nəzərə alınaraq hazırlandığını bildirib. Yefremova artımın minimum əməkhaqqı ilə çalışan təxminən 462 min nəfərin gəlirini artıracağını qeyd edib.

Yefremova 2027-ci il üçün minimum əməkhaqqının 39,80 avro və ya 6,4 faiz artırılmasının nəzərdə tutulduğunu açıqlayıb. Nazir bu tədbirin işçilərin alıcılıq qabiliyyətinin qorunmasına töhfə verməsinin hədəfləndiyini vurğulayıb.

Layihə müzakirələrdən sonra Nazirlər Şurasının baxışına təqdim olunacaq.