Azərbaycan News Agency

Pakistanın Baş nazirinin müavini və xarici işlər naziri Məhəmməd İshaq Darın sədrliyi ilə ölkənin əmək qanunlarının beynəlxalq standartlara uyğunlaşdırılması məqsədilə yüksək səviyyəli qiymətləndirmə iclası keçirilib.

İslamabadda keçirilən iclasda Pakistanın tərəfdar çıxdığı Beynəlxalq Əmək Təşkilatının (ILO) konvensiyaları başda olmaqla, ölkənin beynəlxalq əmək hüququ üzrə öhdəlikləri və onların icrası müzakirə edilib.

Görüşdə yerli qanunvericiliyin qlobal standartlara tam uyğunlaşdırılması üçün tələb olunan hüquqi çərçivələr və nəzarət mexanizmləri ətraflı qiymətləndirilib.

İclasda çıxış edən Baş nazirin müavini və xarici işlər naziri İshaq Dar beynəlxalq əmək standartlarına riayət olunmasının Pakistanın qlobal iqtisadiyyatda mövqeyini gücləndirəcəyini və ixracın rəqabət qabiliyyətini artıracağını bildirib.

Dar milli öhdəliklərin vaxtında yerinə yetirilməsi üçün bütün aidiyyəti nazirliklərin əyalət hökumətləri ilə tam əməkdaşlıq və koordinasiya şəraitində işləməsinin vacibliyini vurğulayıb.

Mühüm iclasda Baş nazirin sənaye və istehsal məsələləri üzrə müşaviri, Baş nazirin xüsusi köməkçisi Tariq Bacva, eləcə də Ticarət, Xaricdə Yaşayan Pakistanlılar və İnsan Hüquqları nazirliklərinin yüksək vəzifəli nümayəndələri və aidiyyəti qurumların rəhbər əməkdaşları iştirak ediblər.