Azərbaycan News Agency

Qətər Xarici İşlər Nazirliyi Qətərin Baş naziri və xarici işlər naziri Şeyx Məhəmməd bin Əbdürrəhman bin Casim Əl Saninin Tehranda İranın xarici işlər naziri Abbas Əraqçi ilə görüşdüyünü açıqlayıb.

Nazirliyin açıqlamasına görə, görüşdə regiondakı son hadisələr, gərginliyin azaldılması və dialoq mühitinin yaradılması istiqamətində səylər, həmçinin regional təhlükəsizlik və sabitliyin gücləndirilməsi müzakirə olunub.

Görüşdə həmçinin Hörmüz boğazından müvəqqəti birgə dəniz nəqliyyatı dəhlizinin yaradılmasını və boğazın minalardan təmizlənməsinə dair birgə layihənin həyata keçirilməsini nəzərdə tutan müvəqqəti çərçivə təklifi ilə bağlı danışıqlar qiymətləndirilib.

Əl Sani qonşu ölkələrin suverenliyinə və naviqasiya azadlığına hörmət edilməsinin vacibliyini vurğulayaraq, gərginliyin azaldılması və fikir ayrılıqlarının dialoq yolu ilə həlli üçün diplomatik səylərin davam etdirilməsinin əhəmiyyətini qeyd edib.

Əraqçi isə Qətərə gərginliyin azaldılması və dialoqun dəstəklənməsi istiqamətində davam edən diplomatik səylərinə görə təşəkkür edib.