Azərbaycan News Agency

Qətər Xarici İşlər Nazirliyi BMT Ərəb Qrupunun İsrailin işğal olunmuş Fələstin ərazilərində məskunlaşma fəaliyyətini genişləndirmək siyasətini pislədiyini açıqlayıb.

Nazirliyin bəyanatına görə, BMT-dəki Ərəb Qrupu Şərqi Qüdsdə (Əl-Qüds) E1 məskunlaşma planını və onunla əlaqəli fəaliyyətləri rədd edərək bunların beynəlxalq hüquqa və BMT Təhlükəsizlik Şurasının 2334 saylı qətnaməsinə zidd olduğunu bildirib. Qrup BMT TŞ-ni öz öhdəliklərini yerinə yetirməyə və İsrailin pozuntularına son qoyulmasını təmin etməyə çağırıb.

Qətərin BMT-dəki daimi nümayəndəsi Şeyxa Alya Əhməd bin Seyf Al Tani BMT-dəki Ərəb Qrupu adından çıxış edərək Fələstin məsələsinin Qərbi Asiyada sülhün mərkəzində dayandığını bildirib və İsrail işğalına son qoyulmasının, Fələstin xalqının öz müqəddəratını təyin etmək hüququnun təmin edilməsinin və paytaxtı Şərqi Qüds olmaqla 4 iyun 1967-ci il sərhədləri daxilində müstəqil dövlətin yaradılmasının vacibliyini vurğulayıb.

Al Tani Qəzzada hərtərəfli planın təcili və tam şəkildə həyata keçirilməsinin, humanitar yardımların bölgəyə təhlükəsiz və fasiləsiz çatdırılmasının və yenidənqurma prosesinin başlanmasının vacibliyini vurğulayıb.

Al Tani İordan çayının qərb sahilində məskunlaşanların zorakılığının artmasını da pisləyərək mülki şəxslərə qarşı hücumların dayandırılmalı və məsul şəxslərin cavab verməli olduğunu bildirib.

Ərəb Qrupu həmçinin Birləşmiş Millətlər Təşkilatının Fələstinli Qaçqınlara Yardım və İşlər üzrə Agentliyinin (UNRWA) fələstinlilərə yönəlmiş fəaliyyətində əvəzsiz roluna diqqət çəkərək agentliyin mandatını yerinə yetirə bilməsi üçün beynəlxalq dəstəyin davam etdirilməsinə çağırıb.