Azərbaycan News Agency

Qətərin Baş naziri və xarici işlər naziri Şeyx Məhəmməd bin Əbdürrəhman bin Casim Əl-Tani Səudiyyə Ərəbistanının xarici işlər naziri Şahzadə Faysal bin Fərhan bin Abdullah Əl Səud ilə telefon danışığı keçirib.

Qətər Xarici İşlər Nazirliyinin açıqlamasına görə, danışıq zamanı iki ölkə arasında əməkdaşlıq əlaqələri və bu münasibətlərin inkişaf etdirilməsi istiqamətində atılacaq addımlar müzakirə olunub.

Tərəflər həmçinin ABŞ ilə İran arasında davam edən vasitəçilik səylərini qiymətləndiriblər. Regional təhlükəsizlik və sabitliyin gücləndirilməsi məqsədilə gərginliyin azaldılmasına yönəlmiş təşəbbüslər üzrə koordinasiyanın artırılması məsələsi də müzakirə olunub.

Əl-Tani davam edən vasitəçilik səylərinin uğur qazanması üçün bütün tərəflərin bu təşəbbüslərə müsbət yanaşmasının vacibliyini vurğulayıb.

O bildirib ki, böhranın əsas səbəblərinin sülh yolu və dialoq vasitəsilə həll edilməsi regionda yeni eskalasiyanın qarşısını almağa və uzunmüddətli razılaşma üçün zəmin yaratmağa kömək edəcək.