Azərbaycan News Agency

Azərbaycan Prezidenti İlham Əliyev oktyabrın 8-də Türkmənbaşı şəhərində keçirilən MDB Milli Mətbəx Festivalını ziyarət edib.

Türkmənistanın 2026-cı ildə MDB-yə sədrliyi çərçivəsində təşkil olunan festivalda səkkiz ölkə təmsil olunur. Festival ərazisində Azərbaycan Mədəniyyət Nazirliyi və Dövlət Turizm Agentliyinin birgə təşkilatçılığı ilə iki bölmədən ibarət milli pavilyon qurulub.

Pavilyonun mətbəx bölməsində Azərbaycanın milli mətbəxi və qastronomiya ənənələri təqdim olunub, ölkənin müxtəlif bölgələrinə xas bitkilər, meyvələr, taxıl məhsulları, çərəzlər və digər məhsullar sərgilənib. UNESCO-nun Qeyri-Maddi Mədəni İrs Siyahısına daxil edilmiş Azərbaycan çay mədəniyyəti də pavilyonda nümayiş etdirilib.

Pavilyonun ikinci bölməsində xalçaçılıq, kəlağayı sənəti, misgərlik, ağac üzərində oyma və keramika sənəti təqdim olunub. Azərbaycan Milli Xalça Muzeyinin ekspozisiyasından istifadə edilməklə XIX əsrə aid Qarabağ evinin interyeri də yenidən yaradılıb.

Festival çərçivəsində gənc muğam ifaçıları Azərbaycan musiqisindən və muğam sənətindən nümunələr səsləndiriblər.

Digər tərəfdən, Türkmənbaşı şəhərində Türkmənistan Prezidenti Sərdar Berdiməhəmmədovun adından rəsmi qəbul və konsert proqramı təşkil olunub. İlham Əliyev də tədbirdə iştirak edib.