Azərbaycan News Agency

Suriya Prezidenti Əhməd əş-Şara ABŞ-nin Suriya və İraq üzrə xüsusi nümayəndəsi Tomas Barrakı Dəməşqdəki Xalq Sarayında qəbul edib. Görüşdə Suriyanın xarici işlər və xaricdə yaşayan suriyalılarla iş üzrə naziri Əsəd Həsən Şeybani də iştirak edib.

Suriya Prezident Administrasiyasının görüşlə bağlı açıqlamasına görə, tərəflər Suriya və regiondakı hadisələri müzakirə ediblər. Görüşdə həmçinin iki ölkənin qarşılıqlı maraq dairəsinə daxil olan müxtəlif məsələlər üzrə əməkdaşlıq və koordinasiya imkanları qiymətləndirilib.

Görüş zamanı hər iki ölkənin maraqlarına xidmət edəcək addımlar, eləcə də təhlükəsizliyin və sabitliyin möhkəmləndirilməsinə töhfə verəcək məsələlər diqqət mərkəzində olub.