Azərbaycan News Agency

Fələstin Xarici İşlər və Xaricdə Yaşayanlar Nazirliyi BƏƏ-də yerləşən ADNOC şirkətinə məxsus tankerin Hörmüz boğazından keçərkən hücuma məruz qalması ilə bağlı bəyanat yayıb. Nazirlik hücumu ən sərt şəkildə pislədiyini və BƏƏ rəhbərliyi, hökuməti və xalqı ilə tam həmrəylik nümayiş etdirdiyini bildirib.

Bəyanatda BƏƏ-nin təhlükəsizliyini və suverenliyini qorumaq üçün gördüyü tədbirlərin dəstəkləndiyi qeyd olunub. Ticarət gəmilərinin hədəfə alınmasının və dəniz nəqliyyatının təhlükəsizliyinə təhdid yaradılmasının beynəlxalq hüququn açıq şəkildə pozulması olduğu vurğulanaraq, bu cür hücumların dəniz yollarının təhlükəsizliyi, regional və beynəlxalq sabitlik üçün birbaşa təhlükə yaratdığı bildirilib.

Fələstin BƏƏ-nin təhlükəsizliyini və sabitliyini hədəf alan bütün hücumları rədd etdiyini və pislədiyini açıqlayıb.