Azərbaycan News Agency

Fələstinin Xarici İşlər və Diaspor Məsələləri nazirinin müavini Ömər Əvadullah Fələstin Dövləti ilə İslam Əməkdaşlıq Təşkilatı arasında əlaqələrin inkişafı məqsədilə milli nazirlik və qurumların iştirakı ilə genişləndirilmiş koordinasiya iclası keçirdi.

Fələstin Xarici İşlər Nazirliyinin məlumatına görə, iclasda 19-dan çox nazirlik və qurumun nümayəndələri, nazir müavinləri, müşavirlər və inzibati rəhbərlər iştirak ediblər. Müzakirələrdə Fələstin ilə İslam Əməkdaşlıq Təşkilatı, onun tabeliyində olan qurumlar və daimi komitələr arasında əməkdaşlığın gücləndirilməsi yolları nəzərdən keçirilib.

İclasda çıxış edən doktor Əvadullah işğal altındakı Fələstin torpaqlarında baş verən siyasi və iqtisadi proseslərə toxunaraq, Fələstin Dövlətinin İslam Əməkdaşlıq Təşkilatındakı mövqeyinin əhəmiyyətini vurğulayıb. O, təşkilatın 47 tabeli qurumu ilə daha səmərəli əməkdaşlıq üçün birgə iş mexanizmlərinin və geniş fəaliyyət planlarının hazırlanmasının vacibliyini qeyd edib.

Fələstin rəsmisi həmçinin hər bir nazirliyin öz fəaliyyət sahəsi üzrə İƏT ilə əlaqələri inkişaf etdirməsinin vacibliyini vurğulayaraq, islam ölkələri ilə iqtisadi, ticarət və institusional əməkdaşlığın genişləndirilməsinin Fələstinin milli maraqlarına xidmət edəcəyini bildirib.

İclasda iştirak edən nazirlik və qurum nümayəndələri də əməkdaşlıq və koordinasiyanın inkişafı ilə bağlı təkliflərini təqdim ediblər.

Görüşün yekununda Fələstin Hökumətinin strateji məqsədlərinə və milli prioritetlərinə uyğun olaraq dayanıqlı inkişafın müxtəlif sahələrini əhatə edən strateji və sektoral fəaliyyət planının hazırlanması barədə razılıq əldə olunduğu bildirilib.