Azərbaycan News Agency

Fələstin Xarici İşlər Nazirliyi UNESCO İcra Şurasının 224-cü iclasında Qəzza zolağındakı vəziyyətlə bağlı qərar qəbul etdiyini bildirib.

Açıqlamaya görə, qərar təşkilatın Qəzzadakı inkişaflarla bağlı əvvəlki qərarlarının icrasının izlənməsini əhatə edir və Fələstin Dövləti lehinə qəbul olunub.

Qərarda Qəzza zolağında təhsil müəssisələrinə, universitetlərə və mədəni irs obyektlərinə dəyən zərərə diqqət çəkilib. Həmçinin jurnalistlər və media işçilərinin üzləşdiyi risklər beynəlxalq humanitar hüquq və UNESCO prinsipləri çərçivəsində qiymətləndirilib.

Fələstin tərəfi bildirib ki, qərarın yekdilliklə qəbul olunması beynəlxalq ictimaiyyətin Qəzzadakı humanitar, təhsil və mədəni vəziyyətə dair məlumatlılığını əks etdirir.

Həmçinin qeyd olunub ki, Fələstin Dövlətinin UNESCO yanında daimi nümayəndəsi Adil Atiyə İcra Şurasına müraciətində Qəzzada təhsil sisteminin dağıdılması, mədəni obyektlərə dəyən ziyan və jurnalist itkiləri ilə bağlı fikirlərini bölüşüb.

Açıqlamada beynəlxalq dəstək çağırışı da yer alıb və Qəzza üçün humanitar, təhsil və mədəni proqramların davam etdirilməsinin əhəmiyyəti vurğulanıb.