Azərbaycan News Agency

Fələstinin xarici işlər naziri doktor Varsen Ağabekyan Şahin İspaniyanın paytaxtı Madriddə keçirilən “Avropa İttifaqı Fələstin xalqı üçün ədaləti təmin edə bilərmi?” adlı seminarda iştirak edib. Ateneo de Madrid Mədəniyyət Mərkəzinin dəvəti ilə təşkil olunan tədbirdə Avropa İttifaqının Fələstin xalqının hüquqlarını qorumaq və ədaləti təmin etmək üçün ata biləcəyi addımlar müzakirə olunub.

Avropa İttifaqının xarici işlər və təhlükəsizlik siyasəti üzrə keçmiş ali nümayəndəsi və İspaniyanın sabiq xarici işlər naziri Josep Borrellin, eləcə də beynəlxalq insan hüquqları təşkilatlarının nümayəndələrinin iştirak etdiyi seminarda çıxış edən Şahin atəşkəsə baxmayaraq, Qəzzada mülki şəxslərin həyatını itirməyə davam etdiyini bildirib. O, Qəzzada aclıq, xəstəliklər, qidalanma çatışmazlığı və sığınacaq problemlərinin ağır şərait yaratdığını qeyd edib.

Şahin İordan çayının qərb sahilində evlərin dağıdılması, fələstinlilərin məcburi köçkün vəziyyətinə salınması, məskunlaşanların zorakılığı, hərəkət məhdudiyyətləri və torpaqların müsadirəsi kimi hallara da toxunub. Beynəlxalq Ədalət Məhkəməsinin məsləhətçi rəylərinə və 2025-ci il Nyu-York Bəyannaməsinə istinad edən Şahin dövlətlərin Fələstin xalqının öz müqəddəratını təyinetmə hüququnu qorumaq və pozuntulara görə məsuliyyət daşıyan şəxslərin cavab verməsini təmin etmək üçün öhdəliklərini yerinə yetirməli olduqlarını deyib.

Fələstinin müstəqil və vahid dövlət kimi tanınmasının genişləndirilməsinə çağıran Şahin beynəlxalq ictimaiyyəti işğala son qoyulması üçün hərəkətə keçməyə dəvət edib. O, həmçinin İspaniyanın Fələstin xalqının hüquqlarına və Fələstin Dövlətinin tanınmasına verdiyi dəstəyi yüksək qiymətləndirib.

Seminardan sonra Josep Borrell ilə görüşən Şahin Avropa İttifaqının və ona üzv ölkələrin Fələstin qarşısındakı məsuliyyətlərini müzakirə edib. Görüşdə İsrail yaşayış məntəqələrində istehsal olunan məhsulların Avropa İttifaqına idxalının və Avropa bazarlarında satışının qarşısını almaq üçün əlavə tədbirlərin görülməsinin vacibliyi vurğulanıb.