Azərbaycan News Agency

Yunanıstanın xarici işlər naziri George Gerapetritis The Economist-in 6-cı Saloniki Metropol Sammiti çərçivəsində keçirilən “Yeni geosiyasi nizam: Qlobal dəyişikliklərin kəsişməsində Cənub-Şərqi Avropa və Aralıq dənizi” adlı müzakirədə çıxış edib.

Salonikin Balkanları daha geniş Şərqi Aralıq dənizi regionu ilə birləşdirən mövqeyinə diqqət çəkən Gerapetritis regionun Avropa və regional sabitlik baxımından mühüm əhəmiyyət daşıdığını bildirib.

Dünyada mühüm geosiyasi dəyişikliklərin baş verdiyini qeyd edən Gerapetritis hazırkı dövrün İkinci Dünya müharibəsindən sonrakı ən çətin dövrlərdən biri olduğunu deyib. O, enerji və bağlantı yollarının geostrateji marşrutlarında da mühüm dəyişikliklərin baş verdiyini bildirib.

Gerapetritis eyni vaxtda üç siyasi hadisənin baş verdiyini bildirərək, bunların qlobal geosiyasi sahədəki dəyişikliklər, siyasi kommunikasiya formasının transformasiyası və media mühitini dəyişdirən sosial medianın təsiri olduğunu deyib.

Sosial medianın insanların informasiyaya çıxış formasını dəyişdirdiyini qeyd edən Gerapetritis bunun qlobal miqyasda yanlış məlumat və dezinformasiya fəaliyyəti üçün də imkan yaratdığını bildirib.