Azərbaycan News Agency

İsrail Müdafiə Qüvvələri (IDF) gecə saatlarında Qərb Sahilində Binyamin Briqadasının məsuliyyət zonasına daxil olan Əl Muğəyyir və Xirbət Əbu Fəllah kəndləri ətrafında genişmiqyaslı təhlükəsizlik əməliyyatı həyata keçirdi.

IDF-in açıqlamasında bildirilib ki, bir İsrail vətəndaşının ona tərəf atəş açıldığı barədə məlumat verməsindən sonra təhlükəsizlik qüvvələri hadisə yerinə göndərilib. Açıqlamada hadisə nəticəsində ölən və ya yaralananın olmadığı qeyd olunub.

İsrail hərbçiləri əraziyə çatdıqdan sonra silahlı hücumun baş verdiyi bildirilən ərazidə geniş axtarış tədbirlərinə başlanılıb.

Ordu həmçinin hücumu həyata keçirməkdə şübhəli bilinən şəxslərin saxlanılması məqsədilə Əl Muğəyyir kəndində axtarış əməliyyatlarının davam etdiyini, bölgəyə gedən yolların isə müvəqqəti olaraq bağlandığını açıqlayıb.