Azərbaycan News Agency

Pakistanın Baş naziri Şahbaz Şərif vəfat edən Qətərin sabiq Əmiri Şeyx Həməd bin Xəlifə Al Sani ilə bağlı başsağlığı mesajı yayımlayıb.

Şərif bildirib ki, sabiq Əmirin vəfat xəbərini dərin hüznlə qarşılayıb və qeyd edib ki, Şeyx Həmədin uzaqgörən rəhbərliyi sayəsində Qətər müasir, firavan və beynəlxalq aləmdə nüfuzlu dövlətə çevrilib.

Şərif vurğulayıb ki, mərhum Əmirin ölkəsinin inkişafına verdiyi töhfələr, həmçinin regional sülhün, iqtisadi inkişafın və beynəlxalq əməkdaşlığın gücləndirilməsi istiqamətində göstərdiyi səylər gələcək nəsillər tərəfindən də xatırlanacaq və o, görkəmli dövlət xadimi kimi tarixdə iz qoyub.

Pakistan xalqı və hökuməti adından başsağlığı verən Şərif Qətər Əmiri Şeyx Təmim bin Həməd Al Saniyə, Al Sani ailəsinə, Qətər hökumətinə və xalqına dərin hüznlə başsağlığı verərək, Pakistanın bu çətin dövrdə Qətərlə tam həmrəylik nümayiş etdirdiyini bildirib.

Şərif əlavə edib ki, Şeyx Həmədin Pakistana olan xüsusi rəğbəti və iki ölkə arasında dostluğun inkişafına verdiyi önəm hər zaman xatırlanacaq. O qeyd edib ki, sabiq Əmirin Pakistana səfərləri iki ölkə münasibətlərində mühüm yer tutub.

Baş nazir Şərif mesajını mərhum Əmirə Allahdan rəhmət, ailəsinə və Qətər xalqına səbir və dözüm arzulamaqla yekunlaşdırıb.