Azərbaycan News Agency

CCTV-nin məlumatına görə, İran İslam İnqilabı Keşikçiləri Korpusu Küveyt, Bəhreyn, İordaniya və İraqın Ərbil şəhərində yerləşən ABŞ bazaları və hərbi obyektlərinə cavab hücumları həyata keçirdiyini bildirib. Korpusun rəsmi xəbər agentliyi Sepah News vasitəsilə yayılan açıqlamada əməliyyatların ABŞ-ın İrana qarşı hərəkətlərinə cavab olaraq həyata keçirildiyi qeyd olunub.

Açıqlamada iddia olunur ki, İordaniyadakı Əl-Əzraq Hərbi Hava Bazasına edilən hava hücumu nəticəsində çox sayda ABŞ döyüş təyyarəsi ciddi zərər görüb, ABŞ hərbi personalının yerləşdiyi kazarmalar vurulub və itkilər verilib. Həmçinin Küveytdəki Əli Əl Salem Hərbi Hava Bazasında yerləşən sursat anbarları və yaşayış obyektlərinin kamikadze pilotsuz uçuş aparatları ilə hədəfə alındığı, Bəhreyndə isə ABŞ-ın Beşinci Donanmasına məxsus obyektlər və rabitə infrastrukturu vurulduğu bildirilib.

Sonda İraqın Ərbil şəhərində yerləşən ABŞ mövqelərinə qarşı keçirilən gözlənilməz əməliyyatlarda bir Patriot hava hücumundan müdafiə sisteminin və casusluq şarının məhv edildiyi, həmçinin hərbçilərin yerləşdiyi ərazilərin də hədəfə alındığı qeyd edilib.