Azərbaycan News Agency

İsrail ordusu 2020-ci ilin may ayında İordan çayının qərb sahilindəki Yabad kəndində keçirilən əməliyyat zamanı israilli baş çavuş Amit Ben Yiqalın ölümünə səbəb olan Nəzmi Əbu Bəkr barəsində çıxarılan məhkəmə qərarını açıqlayıb.

İsrail ordusunun məlumatına görə, Samariya Hərbi Məhkəməsi Əbu Bəkri qəsdən ölümə səbəb olmaq və məhkəmə prosesinə maneçilik törətmək cinayətlərində təqsirli bilib. Məhkəmə onu ömürlük həbsə və 4 milyon şekeldən çox təzminat ödəməyə məhkum edib.

Açıqlamada bildirilib ki, 12 may 2020-ci ildə təhlükəsizlik qüvvələri axtarışda olan şəxslərin saxlanılması məqsədilə Yabad kəndində əməliyyat keçirib. Həmin vaxt Əbu Bəkrin binanın damından çəkisi 9-11 kiloqram arasında olan yarım kərpici İsrail hərbçilərinin üzərinə atdığı, kərpicin Amit Ben Yiqala dəyərək onun ölümünə səbəb olduğu qeyd edilib.

Əbu Bəkrin daha sonra damdan evinə qaçdığı və təhlükəsizlik qüvvələrinin onu tapmasının qarşısını almaq üçün özünü yatmış kimi göstərdiyi bildirilib. Təhlükəsizlik qüvvələri ərazini tərk etdikdən sonra onun hadisə yerinə qayıtdığı, kərpic parçalarını topladığı və istintaqa mane olmaq məqsədilə yol kənarına atdığı qeyd olunub.

İsrail ordusu hərbi prokurorluğun ölkənin və orduda xidmət edən vətəndaşların təhlükəsizliyini təhdid edən hər kəs barəsində hüquqi tədbirlərin görülməsi üçün fəaliyyətini davam etdirəcəyini bildirib.

Açıqlamada həmçinin İsrail ordusunun Ben Yiqalın ailəsinin kədərini bölüşdüyü və ailəyə dəstək verməyə davam edəcəyi vurğulanıb.