Azərbaycan News Agency

İsrail Xarici İşlər Nazirliyi açıqlayıb ki, Qəzza zolağında ələ keçirilən rəsmi sənədlər Fələstin İslami Hərəkatının Qəzzaya göndərilən “Sumud” donanmasında fəal iştirak etdiyini ortaya qoyur. Bildirilib ki, sənədlər donanma rəhbərləri ilə təşkilat arasında birbaşa əlaqə olduğunu göstərir.

Nazirliyin məlumatına görə, hərəkatın Qəzzadakı fəaliyyətlərinə onun regional strukturu, Qəzza xaricindəki fəaliyyətlərinə isə “Xaricdəki Fələstinlilər üçün Fələstin Konfransı” (PCPA) cavabdehdir. 2018-ci ildə yaradılan PCPA hərəkatın xaricdəki nümayəndə orqanı kimi fəaliyyət göstərir, etiraz aksiyalarını, yürüşləri və donanmanın təşkilini əlaqələndirir. İsrail 2021-ci ildə PCPA-nı Fələstin İslami Hərəkatının bir qolu olduğu üçün terror təşkilatı elan edib.

Əldə olunan sənədlər arasında Fələstin İslami Hərəkatının Siyasi Bürosunun rəhbəri İsmayıl Haniyənin 2021-ci il tarixli imzalı məktubu da var idi. Məktubda Haniyə PCPA rəhbərini birliyə çağırır və təşkilata açıq dəstəyini ifadə edirdi.

Başqa bir sənəddə isə PCPA üzvlərinin siyahısı yer alıb. Siyahıda Böyük Britaniyadakı qurumun rəhbəri Zaher Biravi və İspaniyadakı üzv Səif Əbu Qaşkın adları olub. Məlumata görə, Əbu Qaşk həmçinin İspaniyada yerləşən “Cyber Neptune” şirkətinin baş direktorudur. Bu şirkətə məxsus onlarla gəmi “Sumud” donanmasına qoşulub və iddia olunur ki, həmin gəmilər əslində Fələstin İslami Hərəkatına məxsusdur.