Azərbaycan News Agency

Fələstin Xarici İşlər və Mühacirlər Nazirliyi BMT Baş katibinin “münaqişə ilə bağlı cinsi zorakılıq” hesabatında İsrailin silahlı münaqişə şəraitində zorlamaya və digər cinsi zorakılıq formalarına görə məsul tərəflər arasında yer almasını alqışladığını bildirib.

Nazirlik açıqlamasında hesabatda fələstinli qadınlar, kişilər və uşaqlara qarşı müxtəlif cinsi zorakılıq hallarına yer verildiyi və İsrailin fələstinlilərə qarşı hərəkətlərinin uzun müddətdir sistemli siyasət kimi sənədləşdirildiyi iddia edilib.

Açıqlamada zorlamə, zorlamaya cəhd, cinsi hücum, məcburi soyundurulma və cinsi zorakılıq təhdidləri kimi halların qeyd edildiyi bildirilib.

Nazirlik həmçinin İsrailli məskunlaşanların fələstinli icmalara qarşı hərəkətlərinin araşdırılması və müvafiq mexanizmlər çərçivəsində qiymətləndirilməsi çağırışı edib.

Fələstin Xarici İşlər Nazirliyi beynəlxalq ictimaiyyəti fələstinlilərin qorunması üçün addımlar atmağa, hesabatlılıq və sanksiya mexanizmlərini işə salmağa və qurbanlar üçün hərtərəfli tibbi, psixoloji və sosial dəstək proqramları yaratmağa çağırıb.