Azərbaycan News Agency

İsveçrə Prezidenti Qay Parmelen yanğını ölkə tarixinin ən travmatik hadisələrindən biri adlandıraraq beş günlük matəm elan ediləcəyini bildirib. “Bu, miqyası naməlum bir faciə idi”, – deyən Parmelen “itirilmiş və yarımçıq qalmış çoxsaylı gənc həyatlara” ehtiramını ifadə edib.

İsveçrə Prezidenti “layihələri, ümidləri və arzuları” yarımçıq qalan bu gənclər qarşısında belə bir faciənin bir daha heç vaxt yaşanmamasını təmin etməyin borc olduğunu vurğulayıb.

Yanğın şəhərdəki “Le Constellation” barında gecə saat 01:30-da baş verib, lakin səbəbi hələlik məlum deyil. Bəzi şahidlər yanğının şampan şüşələrinə fişəng və ya siqnal fişəngi yerləşdirildikdən sonra başladığını deyiblər.

Şahidlərin sözlərinə görə, alovlar tavanı alışdırıb və saniyələr ərzində yayılaraq, əylənənlərlə dolu sıx bir zirzəmini bürüyüb.

İsveçrə polisi xəbərdarlıq edib ki, faciədə həlak olanların hamısının kimliyinin müəyyənləşdirilməsi günlər, hətta həftələr çəkə bilər. Yanğın zamanı barda olanların dəqiq sayı hələ də qeyri-müəyyəndir və polisin məlumatına görə, neçə nəfərin hələ də itkin olduğu açıqlanmayıb.

Kantonun baş prokuroru Beatrice Pilloud bildirib ki, “qurbanların kimliyini müəyyənləşdirmək və cəsədləri mümkün qədər tez ailələrinə təhvil vermək üçün” əhəmiyyətli resurslar səfərbər edilib.