Azərbaycan News Agency

İtaliyanın Baş naziri Giorgia Meloni beynəlxalq gərginlik səbəbindən yanacaq qiymətlərində baş verən artımın nəqliyyat, kənd təsərrüfatı və istehlak qiymətləri üzərində təzyiq yaratdığını bildirərək, hökumətin dizel qiymətlərinin aşağı salınmasına yönəlmiş yeni addım atdığını açıqlayıb.

Meloni Nazirlər Şurasının dizel yanacağına tətbiq olunan verginin dərhal azaldılmasını nəzərdə tutan fərmanı təsdiqlədiyini bildirib.

Sözügedən tədbirin problemi tam həll etməyəcəyini deyən Meloni, mövcud iqtisadi imkanlar və beynəlxalq hadisələr nəzərə alınaraq sürətli və məsuliyyətli addım atıldığını qeyd edib.

Meloni hökumətin beynəlxalq hadisələri və münaqişələrin gedişini yaxından izlədiyini bildirərək, zəruri hesab ediləcəyi təqdirdə qərarın müddəti başa çatmadan yenidən toplanaraq əlavə addımların nəzərdən keçiriləcəyini söyləyib.

Meloni vətəndaşları və ölkə iqtisadiyyatına töhfə verən sahələri dəstəkləmək üçün imkanlar daxilində bütün tədbirlərin görülməsinə davam ediləcəyini bildirib.