Azərbaycan News Agency

Qətərin Baş naziri və xarici işlər naziri Şeyx Məhəmməd bin Əbdürrəhman Al Sani İordaniyanın baş nazir müavini və xarici işlər naziri Eymən Səfadi ilə telefon danışığı aparıb.

Qətər Xarici İşlər Nazirliyinin açıqlamasına görə, danışıq zamanı iki ölkə arasında əməkdaşlıq və bu əməkdaşlığın daha da inkişaf etdirilməsi istiqamətində atılacaq addımlar müzakirə olunub.

Tərəflər həmçinin bölgədəki son hadisələri, gərginliyin azaldılmasına, təhlükəsizlik və sabitliyin möhkəmləndirilməsinə yönəlmiş diplomatik təşəbbüsləri və birgə koordinasiya fəaliyyətlərini nəzərdən keçiriblər.

Al Sani bütün tərəflərin dialoq və diplomatiyaya sadiq qalmasının vacibliyini vurğulayaraq, ABŞ ilə İran arasında imzalanmış anlaşma memorandumu çərçivəsində əldə olunmuş razılaşmaların həyata keçirilməsinin, Hörmüz boğazında naviqasiya azadlığının təmin edilməsinin, eləcə də regional təhlükəsizlik və sabitliyin qorunmasının mühüm əhəmiyyət daşıdığını bildirib.

Bildirilib ki, Qətər bölgədə gərginliyin azaldılması və davamlı sülhün təmin olunmasına yönəlmiş bütün təşəbbüsləri dəstəkləməyə davam edir.