Azərbaycan News Agency

Pakistan Xarici İşlər Nazirliyinin açıqlamasına görə, Baş nazirin müavini və xarici işlər naziri Mohammad Ishaq Dar Pakistan ilə Oman arasında Birgə Nazirlər Komissiyasının 8-ci sessiyasına hazırlığı qiymətləndirmək məqsədilə nazirliklərarası iclasa sədrlik edib.

İclasda gündəlik, ikitərəfli sazişlər və sessiyanın təşkili ilə bağlı məsələlər müzakirə olunub. Pakistan və Oman arasında ticarət, investisiya, sənaye, kənd təsərrüfatı, maliyyə, neft və təbii qaz, əmək, konsulluq işləri, təhlükəsizlik, müdafiə, iqlim dəyişikliyi, mülki aviasiya, təhsil, media və mədəniyyət sahələrində əməkdaşlığın inkişaf etdirilməsi hədəflənir.

Dar komissiyanın ikitərəfli münasibətlərin gücləndirilməsi baxımından əhəmiyyətini vurğulayaraq, aidiyyəti qurumlara hazırlıqların tamamlanması və iclasdan sonra qəbul ediləcək qərarların həyata keçirilməsi üçün zəruri işlərin görülməsi barədə tapşırıq verib.

İclasda Baş nazirin xüsusi köməkçisi Tariq Bajwa, aidiyyəti nazirliklərin yüksək vəzifəli rəsmiləri və Pakistanın Omandakı səfiri də iştirak edib.