Azərbaycan News Agency

Pakistan Xarici İşlər Nazirliyinin açıqlamasına görə, Milli İqtisadi Şuranın İcraiyyə Komitəsi (ECNEC) Baş nazirin müavini və xarici işlər naziri senator Məhəmməd İshaq Darın sədrliyi ilə iclas keçirib. İclasda ölkə üzrə 11 inkişaf layihəsi təsdiqlənib.

Təsdiqlənən layihələr arasında Hayber Paxtunxva əyalətində 40,8 meqavat gücündə Koto Su Elektrik Layihəsi, Bəlucistandakı Lasbela kanalının bərpası və yenidən təşkili, Qvadara Mirani bəndindən su verilməsi və müxtəlif avtomobil yolu layihələri yer alıb.

Komitə həmçinin Gilgit-Baltistanda ümumi gücü 100 meqavat olan paylanmış günəş elektrik stansiyalarının inkişafını, İslamabadda Kral Salman bin Əbdüləziz Al Səud Xəstəxanasının yaradılmasını və Milli Məhkəmə-Ekspertiza Agentliyi üçün xüsusi laboratoriyanın tikintisini təsdiqləyib. Pəncab Şəhər Torpaq Sistemlərinin İnkişafı Layihəsi də qəbul edilən layihələr sırasında yer alıb.

Dar layihələrin qrafikə uyğun və xərc artımı olmadan tamamlanmasının vacibliyini vurğulayıb. O, aidiyyəti qurumlara maliyyə intizamını qorumaq və inzibati proseslərdəki maneələri aradan qaldırmaq barədə tapşırıq verərək, layihələrin ictimai maraqlara xidmət etməli olduğunu bildirib.