Azərbaycan News Agency

Pakistanın Baş nazirinin müavini və xarici işlər naziri senator Məhəmməd İshaq Dar Filippinin paytaxtı Manilada keçirilən ASEAN Regional Forumu (ARF 2026) çərçivəsində Omanın xarici işlər naziri Seyyid Bədr bin Həməd Əl-Busaidi ilə görüşüb.

Pakistan Xarici İşlər Nazirliyinin açıqlamasına əsasən, tərəflər Pakistan ilə Oman arasında ikitərəfli əməkdaşlığın müsbət inkişafından məmnunluqlarını ifadə ediblər.

Görüşdə yüksək səviyyəli təmasların artırılması, ticarət və investisiyaların inkişaf etdirilməsi, xalqlar arasında əlaqələrin gücləndirilməsi, işgüzar dairələr arasında əlaqələrin genişləndirilməsi və çoxtərəfli platformalarda koordinasiyanın davam etdirilməsi barədə razılıq əldə olunub.

Hər iki nazir həmçinin son regional və beynəlxalq hadisələr barədə fikir mübadiləsi aparıb.

Omanın xarici işlər naziri Əl-Busaidi Pakistanın dialoqun təşviqi, gərginliyin azaldılması, regional sülh və təhlükəsizliyin dəstəklənməsi istiqamətində oynadığı konstruktiv rolu yüksək qiymətləndirib.

Tərəflər bölgədəki son hadisələrdən narahat olduqlarını bildirərək atəşkəsin qorunmasının, beynəlxalq hüquqa hörmət edilməsinin və davamlı sülh və sabitliyə nail olmaq üçün diplomatik səylərin davam etdirilməsinin vacibliyini vurğulayıblar.

Görüşün sonunda Pakistan və Oman ikitərəfli və regional məsələlər üzrə sıx təmas və məsləhətləşmələri davam etdirmək barədə razılığa gəliblər.