Azərbaycan News Agency

Xorvatiyanın Baş naziri Andrej Plenkovic Xorvatiyanın səfirləri, baş konsulları, konsulları və hərbi attaşelərinin iştirak etdiyi illik konfransla bağlı açıqlama verib.

Plenkovic Xorvatiyanın qlobal mövqeyini gücləndirmək, xarici siyasət prioritetlərini dəstəkləmək və diplomatik nümayəndəliklərin milli maraqların qorunmasına yönəlmiş fəaliyyətini inkişaf etdirmək üçün çalışdıqlarını bildirib.

Xorvatiyanın Şimali Atlantika Müqaviləsi Təşkilatının (NATO) və Avropa İttifaqının (Aİ) üzvü olduğunu qeyd edən Plenkovic ölkənin 2023-cü ildən Şengen zonasına və Avrozonaya daxil olduğunu, həmçinin İqtisadi Əməkdaşlıq və İnkişaf Təşkilatına (OECD) üzvlük prosesində olduğunu bildirib.

Plenkovic prioritet məsələlər arasında enerji təhlükəsizliyinin gücləndirilməsi, Xorvatiyanın Avropanın enerji xəritəsindəki mövqeyinin yaxşılaşdırılması, müdafiə imkanlarının artırılması, Ukraynaya dəstəyin davam etdirilməsi, iqlim məsələləri və transatlantik münasibətlərin qorunmasının yer aldığını bildirib.

Avropa İttifaqının genişlənməsinin də əhəmiyyətli olduğunu vurğulayan Plenkovic xüsusilə Bosniya və Herseqovinanın Avropa yolunun dəstəklənməli olduğunu və ölkədəki üç qurucu xalqın bərabər hüquqlara malik olmasının vacibliyini qeyd edib.

Plenkovic Xorvatiyanın çoxtərəfliliyə və qaydalara əsaslanan beynəlxalq nizama sadiqliyini davam etdirəcəyini, diplomatik şəbəkənin isə ölkənin maraqlarını qorumağa və Xorvatiyanı dünyada tanıtmağa davam edəcəyini bildirib.