Azərbaycan News Agency

Qətər Suriya Demokratik Qüvvələrinin (SDQ) Suriya Ərəb Respublikasının hərbi qurumlarına inteqrasiyasını alqışladığını açıqlayıb.

Qətər Xarici İşlər Nazirliyinin açıqlamasında bildirilib ki, bu inkişaf vətəndaş sülhünün möhkəmləndirilməsi, təhlükəsizlik və sabitliyin gücləndirilməsi, eləcə də institutlar və qanunun aliliyi əsasında dövlət qurulması baxımından mühüm addımdır.

Qətər Suriyanın sabitliyi və rifahının dövlətin bütün suriyalıları təmsil edən vahid orduya malik olması və güc tətbiqi üzərində inhisarı əlində saxlaması ilə möhkəmlənəcəyi barədə mövqeyini bir daha təsdiqləyib.

Açıqlamada bu yanaşmanın Suriyanın suverenliyinin, müstəqilliyinin və ərazi bütövlüyünün qorunmasına töhfə verəcəyi vurğulanıb.

Qətər Xarici İşlər Nazirliyi həmçinin Suriyanın yanaşmasını və Suriya xalqının bütün təbəqələrini dövlət hakimiyyəti altında bir araya gətirməyə yönəlmiş birgə səyləri yüksək qiymətləndirdiyini bildirib.

Qətər açıqlamasında Suriyanın suverenliyinə dəstəyini də bir daha təsdiqləyib. Doha rəhbərliyi həmçinin Suriya xalqının azadlıq, inkişaf və rifahla bağlı gözləntilərinə tam dəstəyini yenidən ifadə edib.