Azərbaycan News Agency

İran Parlamentinin sədri Məhəmməd Baqer Qalibaf ABŞ ilə Pakistanda keçirilən danışıqlarla bağlı qiymətləndirmələr aparıb.

Qalibaf açıqlamasında deyib: “Lazımi xoş niyyət və iradəyə sahibik, lakin əvvəlki iki müharibənin təcrübəsinə görə qarşı tərəfə etibar etmirik”.

Pakistanda aparılan danışıqlar prosesinə toxunan Qalibaf qeyd edib ki, İran nümayəndə heyəti müxtəlif təşəbbüslər göstərib, lakin bu mərhələdə ABŞ tərəfi etimad yarada bilməyib.

ABŞ-la bağlı qiymətləndirməsində Qalibaf deyib: “Amerika bizim məntiqimizi və prinsiplərimizi anlayıb. Bundan sonra etimadımızı qazanıb-qazana bilməyəcəyinə qərar verməlidir”.

Diplomatiyanın əhəmiyyətini vurğulayan Qalibaf bildirib ki, hərbi mübarizə ilə yanaşı diplomatik yollar da davam etdiriləcək.

Qalibaf danışıqlar prosesinə verdiyi töhfəyə görə Pakistana təşəkkür edib.