Azərbaycan News Agency

Qətər Xarici İşlər Nazirliyi İsrailin müdafiə naziri Israel Katzın Suriya ərazisinə daxil olmasını və beynəlxalq sərhədlərin pozulmasını pisləyib.

Nazirliyin açıqlamasında bu girişin Suriya Ərəb Respublikasının suverenliyinin və ərazi bütövlüyünün pozulması olduğu bildirilib.

Qətər beynəlxalq ictimaiyyəti İsrailin beynəlxalq legitimlik qərarlarına əməl etməsini təmin etmək və Suriya ərazisinə qarşı təkrarlanan hücumlara son qoymaq üçün təcili tədbirlər görməyə çağırıb.

Açıqlamada xüsusilə 1974-cü il atəşkəs razılaşmasına riayət edilməsinin vacibliyinə diqqət çəkilib və regionda eskalasiya və gərginliyin qarşısının alınmasının zəruriliyi vurğulanıb.

Qətər Xarici İşlər Nazirliyi ölkəsinin Suriyanın suverenliyinin, müstəqilliyinin və ərazi bütövlüyünün qorunmasına dəstəyini bir daha təsdiqləyib.

Nazirlik həmçinin Suriya xalqının təhlükəsizliyinin, sabitliyinin və rifahının təmin edilməsinə yönəlmiş dəstəyin davam etdiriləcəyini bildirib.