Azərbaycan News Agency

Qətər Xarici İşlər Nazirliyi İsrailin Qəzza zolağının cənubundakı Xan Yunisdə yerləşən Nasir Tibb Kompleksinin cərrahiyyə şöbəsinə təşkil etdiyi hücumu pisləyib.

Nazirliyin açıqlamasında çoxsaylı mülki şəxsin həlak olduğu və yaralandığı hücumun Fələstin xalqına qarşı törədilmiş dəhşətli cinayət və beynəlxalq hüququn açıq şəkildə pozulması olduğu vurğulanıb. Qətər İsrailin Qəzza zolağına qarşı davam edən, o cümlədən xəstəxanaları və mülki obyektləri hədəf alan hücumlarını qətiyyətlə rədd etdiyini bir daha bəyan edib.

Beynəlxalq ictimaiyyəti mülki şəxsləri qorumaq məsuliyyətini yerinə yetirməyə və bu cür vəhşiliklərə görə məsuliyyət daşıyan şəxsləri cavabdeh etməyə çağıran Nazirlik, paytaxtı Şərqi Qüds olan müstəqil Fələstin dövlətinin yaradılmasını təmin edən iki dövlətli həll əsasında Fələstin məsələsinə və Fələstin xalqının müqavimətinə sarsılmaz dəstəyini bir daha təsdiqləyib.