Azərbaycan News Agency

Qətərin Baş naziri və xarici işlər naziri Al Sani Riyadda keçirilən Ərəb və İslam ölkələrinin xarici işlər nazirlərinin Məşvərət Toplantısında iştirak edib.

Toplantıda Səudiyyə Ərəbistanı, Azərbaycan, İordaniya, Birləşmiş Ərəb Əmirlikləri, Bəhreyn, Pakistan, Türkiyə, Suriya, Küveyt, Livan və Misirdən xarici işlər nazirləri və nümayəndələr iştirak edib.

Toplantıda İranın raket və pilotsuz uçuş aparatları ilə həyata keçirdiyi hücumlar müzakirə olunub, bu hücumların suverenliyin və beynəlxalq hüququn pozulması olduğu vurğulanaraq qətiyyətlə pislənib.

Toplantıda baş verən itkilərə görə İran məsul tutulub və hücumların dərhal və qeyd-şərtsiz dayandırılması çağırışı edilib.

Milis qruplarına verilən dəstəyin və təhlükəsizliyi pozan fəaliyyətlərin təhlükəsinə diqqət çəkilərək İranın siyasətlərinə yenidən baxmasının vacibliyi bildirilib.

Həmçinin vurğulanıb ki, İranın yaxşı qonşuluq prinsiplərini və dövlətlərin suverenliyini pozmağa davam etməsi ciddi nəticələrə səbəb olacaq.