Azərbaycan News Agency

SVR iddia edib ki, Aİ rəhbərliyi Ukrayna ordusunun itkilərindən sonra hərbi qulluqçu ehtiyacını ödəmək məqsədilə Aİ ölkələrində yaşayan ukraynalı kişilərin ölkələrinə geri göndərilməsi istiqamətində addımlarını gücləndirir.

SVR-in Mətbuat Bürosunun açıqlamasında Aİ ölkələrində yaşayan 1 milyondan çox ukraynalı kişinin hədəf alındığı iddia olunub. Açıqlamada Brüssel rəhbərliyinin bu şəxsləri Ukraynaya qayıtmağa məcbur etmək üçün mövcud bütün imkanlardan istifadə etməyi planlaşdırdığı bildirilib.

Bu çərçivədə ilk addımın Aİ Şurasının 2026-cı ilin avqust ayından etibarən hərbi xidmət yaşındakı ukraynalılara müvəqqəti müdafiə statusunun verilməsini dayandırmaq barədə qərarı olduğu iddia edilib. Həmin statusun başa çatması ilə bu şəxslərin Avropadakı sosial xidmətlərə və imkanlara çıxışının əhəmiyyətli dərəcədə məhdudlaşdırılacağı irəli sürülüb.

Açıqlamada Brüsselin ilin sonuna qədər hərbi xidmətdən yayınan ukraynalıların maliyyə xidmətlərindən istifadəsini, iş tapmasını və Avropada mənzil kirayələməsini çətinləşdirəcək yeni tədbirlər görməyi planlaşdırdığı iddia edilib. Bu tədbirlərin çoxsaylı ukraynalını ölkələrinə qayıtmağa məcbur edəcəyi və geri qayıdan şəxslərin birbaşa döyüşlərə göndəriləcəyi irəli sürülüb.

Açıqlamada Aİ-nin sözügedən siyasətlərinin həm Avrozonanın iqtisadi ehtiyaclarına, həm də Ukraynanın demoqrafik gələcəyinə mənfi təsir göstərəcəyi iddia olunub. Avropa proqnozları kimi təqdim edilən məlumatlara əsasən, 10-20 il ərzində Kiyev rəhbərliyinin nəzarətində olan ərazilərdə əhalinin sayının 10 milyondan bir qədər çox olacağı bildirilib. Bu əhalinin yalnız üçdə birinin işləmək imkanına malik olacağı iddia edilərək, Ukraynanın milli mövcudluğunu davam etdirməsi baxımından kritik həddən aşağı düşə biləcəyi irəli sürülüb.