Azərbaycan News Agency

Estoniyanın xarici işlər naziri Marqus Tsahkna Rusiya-Ukrayna müharibəsi ilə bağlı ABŞ-ın vasitəçiliyi ilə Əbu-Dabidə keçiriləcək danışıqları qiymətləndirib.

ERR televiziyasına danışan Tsahkna Rusiya, Ukrayna və ABŞ arasında keçiriləcək üçtərəfli danışıqların Avropanı da əhatə edən daha geniş sülh sazişi ilə nəticələnəcəyindən narahat olmağa əsas olmadığını bildirib. Danışıqlarda Fransa, Böyük Britaniya və Almaniyadan nümayəndələrin də iştirak etdiyini qeyd edən Tsahkna Avropanın danışıqlar prosesində yer almasının vacibliyini vurğulayıb.

Avropanın Ukraynaya dəstək verdiyini və Rusiyaya təzyiqin davam etdirilməsində rol oynadığını bildirən Tsahkna deyib: "Hazırda Ukraynaya maliyyə dəstəyi verən və Rusiyaya təzyiq göstərən tərəf Avropadır. Avropanın təhlükəsizlik arxitekturasını da formalaşdıracaq sülh sazişi əldə olunarsa, Ukrayna və Avropanın danışıqlar masasında olması, bizə aid məsələlərin bizimlə birlikdə qərarlaşdırılması təbiidir".

Tsahkna Polşada Baltik dənizi regionu ölkələrinin xarici işlər nazirlərinin iştirakı ilə keçirilən görüşə də toxunaraq, müzakirələrdə Ukraynaya dəstəyin artırılması və Rusiyaya təzyiqin gücləndirilməsi istiqamətində addımların nəzərdən keçirildiyini bildirib.

Atəşkəsin əldə olunmasının Rusiya ilə Ukrayna arasında sülh danışıqlarına yol aça biləcəyini qeyd edən Tsahkna Ukrayna və Avropa üçün təhlükəsizlik zəmanətlərinin hazırlanmasının vacibliyini vurğulayıb.

Tsahkna deyib: "Gələcəkdə NATO, Avropa İttifaqı və Rusiya arasında boz zonalar, neytral zonalar və ya bufer zonalar olmamalıdır. Avropanın sülh danışıqlarındakı rolunun bu qədər vacib olmasının səbəbi də budur".

Avropanı danışıqlarda kimin təmsil edəcəyi ilə bağlı ortaq razılığa gəlinə biləcəyini bildirən Tsahkna təmsilçilik prosesinin Avropa İttifaqına üzv olmayan Böyük Britaniya, Norveç və İslandiya kimi ölkələri də əhatə etməli olduğunu qeyd edib.

Əbu-Dabidə keçiriləcək danışıqların mümkün nəticələrini qiymətləndirən Tsahkna müzakirələrdən Avropanı da əhatə edən hərtərəfli sülh sazişinin əldə olunacağını gözləmədiyini bildirib.

Tsahkna deyib: "Bu danışıqlar Avropanı əhatə edən sülh sazişi ortaya çıxara bilməz. Əldə edilə biləcək ən yaxşı nəticə atəşkəsdir, yəni silahların susmasıdır. Yalnız bundan sonra başqa danışıqlar aparıla bilər. Şəxsən mən Putinin atəşkəs istədiyinə inanmıram. O, Qərb dünyasını parçalamaq istəyir".