Azərbaycan News Agency

Pakistanın Baş naziri Şahbaz Şərif Səudiyyə Ərəbistanının vəliəhdi və baş naziri Məhəmməd bin Salmanla telefon danışığında Qırmızı dənizdə Səudiyyə neft tankerlərinə qarşı husilərin hücumlarını pisləyərək Pakistanın Səudiyyə Ərəbistanı ilə tam həmrəy olduğunu vurğulayıb.

Şərif sosial media hesabında bildirib ki, vəliəhd Məhəmməd bin Salmanla bölgədəki son təhlükəsizlik məsələlərini müzakirə ediblər.

Şərif husi silahlılarının Qırmızı dənizdə Səudiyyə neft tankerlərinə hücumlarını qəbuledilməz adlandıraraq, bu hərəkətlərin beynəlxalq hüququ pozduğunu, dənizdə sərbəst naviqasiyanı təhdid etdiyini və regional sülhə və təhlükəsizliyə zərər vurduğunu bildirib.

Pakistanın Səudiyyə Ərəbistanı ilə tam həmrəy olduğunu bir daha vurğulayan Şərif bildirib ki, Baş Qərargah rəisi feldmarşal Seyid Asim Munir və Pakistan xalqı adından vəliəhdə bu həssas dövrdə Səudiyyə rəhbərliyi və xalqının yanında olduqlarını çatdırıb.

Görüş zamanı iki lider Qırmızı dəniz və Hörmüz boğazı vasitəsilə həyata keçirilən beynəlxalq dəniz ticarətinin fasiləsiz davam etməsinin vacibliyini vurğulayıblar.

Şərif və Məhəmməd bin Salman regional sülhün, təhlükəsizliyin və sabitliyin qorunması məqsədilə sıx əməkdaşlığın davam etdirilməsi barədə razılığa gəliblər.