Azərbaycan News Agency

CCTV-nin məlumatına görə, Səudiyyə Ərəbistanı ilə Amerika Birləşmiş Ştatları (ABŞ) nüvə enerjisindən dinc məqsədlərlə istifadə sahəsində əməkdaşlığı gücləndirən yeni saziş imzalayıb.

Səudiyyə Ərəbistanının Enerji Nazirliyi bildirib ki, saziş iki ölkə arasında uzun illərə söykənən strateji tərəfdaşlığa əsaslanır.

Açıqlamada qeyd olunub ki, saziş Səudiyyə Ərəbistanının vəliəhdi və baş naziri Məhəmməd bin Salmanın ötən ilin noyabr ayında ABŞ-yə səfəri zamanı nüvə enerjisinin dinc məqsədlərlə istifadəsinə dair ikitərəfli danışıqların başa çatdırılacağının elan edilməsindən sonra həyata keçirilib.

Bildirilib ki, saziş nüvə enerjisinin dinc məqsədlərlə istifadəsi üzrə əməkdaşlığın inkişaf etdirilməsini, nüvə təhlükəsizliyi, nüvə mühafizəsi və nüvə silahlarının yayılmasının qarşısının alınması sahələrində ən yüksək beynəlxalq standartlara uyğun olaraq təcrübə, bilik və texnologiya mübadiləsinin asanlaşdırılmasını hədəfləyir.

Səudiyyə Ərəbistanının Enerji Nazirliyi əlavə edib ki, memorandum ölkənin enerji mənbələrinin şaxələndirilməsi məqsədlərinə töhfə verəcək, qabaqcıl texnologiyaların inkişafını dəstəkləyəcək və iki ölkə arasında investisiya və əməkdaşlıq imkanlarının genişlənməsinə zəmin yaradacaq.