Azərbaycan News Agency

Ukraynanın xarici işlər naziri Andriy Sıbiha verdiyi açıqlamada Rusiyanın Dnipro, Zaporojye, Çernihiv və Kremençuk şəhərlərində mülki şəxsləri hədəf alan hücumlar həyata keçirdiyini bildirib. Sıbiha Dniproda sərnişinlərin qatar gözlədiyi vaxt dəmir yolu platformasına pilotsuz uçuş aparatı ilə edilən hücum nəticəsində ən azı 14 nəfərin həlak olduğunu, 14 nəfərin isə yaralandığını qeyd edib.

Sıbiha Zaporojyedə sərnişin avtobusunun hədəf alındığını və ən azı bir nəfərin yaralandığını bildirib. O, Çernihivdəki hücumda 15 yaşlı iki qızın həyatını itirdiyini, 23 nəfərin yaralandığını ifadə edib. Kremençukda yaşayış binasına edilən hücum nəticəsində isə ən azı 3 nəfərin həlak olduğunu, 5-i uşaq olmaqla 19 nəfərin yaralandığını qeyd edib.

Hücumların mülki şəxsləri hədəf aldığını bildirən Sıbiha sanksiyaların yumşaldılması, rusiyalı oliqarxların sanksiya siyahılarından çıxarılması və sanksiya istisnalarının tətbiqi kimi addımların dayandırılmasının vacibliyini vurğulayıb.

Sıbiha Ukraynaya hava hücumundan müdafiə sahəsində daha çox dəstək göstərilməsinə, Rusiyaya təzyiqin artırılmasına və ölkənin pilotsuz uçuş aparatları ilə raket istehsalını pozacaq qətiyyətli tədbirlərin görülməsinə çağırıb.