Azərbaycan News Agency

Suriya Xarici İşlər və Mühacirlər Nazirliyi İsrailin müdafiə naziri Yisrael Katzın bu gün Suriya sərhədini icazəsiz keçdiyini bildirərək hadisəni pisləyib.

Nazirliyin açıqlamasında Katzın Suriya Ərəb Respublikasının beynəlxalq sərhədlərini keçməsinin ölkənin suverenliyinin və ərazi bütövlüyünün açıq şəkildə pozulması olduğu bildirilib.

Açıqlamada bu hərəkətlərin açıq təxribat, beynəlxalq hüququn və Birləşmiş Millətlər Təşkilatının Nizamnaməsinin pozulması olduğu vurğulanıb. Həmçinin 1974-cü il Qüvvələrin Ayrılması Sazişi üzrə öhdəliklərin pozulduğu qeyd edilərək, sazişin atəşkəs xətlərinə hörmət edilməsini və bu xətlərin keçilməməsini nəzərdə tutduğu xatırladılıb.

Suriya rəhbərliyi beynəlxalq ictimaiyyəti hüquqi və siyasi məsuliyyətlərini yerinə yetirməyə çağırıb. Açıqlamada İsrail hakimiyyətinin təkrarlanan pozuntuları dayandırmağa məcbur edilməsi, İsrail qüvvələrinin Suriya ərazisində daxil olduqları bölgələrdən dərhal və tam şəkildə çıxaraq qüvvələrin ayrılması xəttinə qayıtması tələb olunub.

Dəməşq rəhbərliyi həmçinin İsraildən Suriya Ərəb Respublikasının suverenliyinə və ərazi bütövlüyünə hörmət etməsini tələb edib.