Azərbaycan News Agency

İtaliyanın Baş nazirinin müavini və xarici işlər naziri Antonio Tacani ölkənin müxtəlif şəhərlərində keçirilən etiraz aksiyaları zamanı baş verən zorakılıq hadisələri ilə bağlı açıqlama verib.

Tacani sosial media hesabında paylaşdığı açıqlamada nümayiş keçirmək hüququnun və azadlığının fundamental hüquqlar olduğunu, lakin bütün vətəndaşların təhlükəsizlik hüququnun və təhlükəsizlik qüvvələri əməkdaşlarının hücuma məruz qalmamaq hüququnun da eyni dərəcədə vacib olduğunu bildirib.

Milan, Bolonya və Turinlə yanaşı, etiraz aksiyalarının keçirildiyi digər şəhərlərdə baş verən zorakılıq və vandalizm hadisələrini tamamilə qəbuledilməz adlandıran Tacani bu əməllərin pislənilməli olduğunu vurğulayıb.

Tacani müxalifətin bir hissəsini də küçələrdə zorakılıqla müşayiət olunan etirazları qızışdırmaqda ittiham edərək bunun fikir və təklif çatışmazlığını kompensasiya etmək cəhdi olduğunu iddia edib.

Təhlükəsizlik qüvvələri ilə həmrəy olduğunu bildirən Tacani hüquq-mühafizə orqanlarının zorakılığa əl atmayan nümayişçilər də daxil olmaqla, hər kəsin hüquqlarını və şəhərlərin təhlükəsizliyini qorumaq üçün vəzifələrini yerinə yetirdiyini vurğulayıb.