Azərbaycan News Agency

İtaliyanın Baş nazirinin müavini və xarici işlər naziri Antonio Tajani narkotik asılılığından xilas olmağa yönəlmiş terapevtik icmalardan biri olan San Patrignano-ya səfər edib.

Tajani hökumətin insanların yenidən həyata qazandırılmasına töhfə verən bu strukturları dəstəklədiyini bildirib. Narkotik asılılığının müalicəsində icmaların rolunun əhəmiyyətinə diqqət çəkən Tajani, xüsusilə həbsxanalardakı narkotik asılılarının sağalma prosesində bu mərkəzlərdən daha geniş istifadə olunmasını müdafiə edib.

Tajani asılılıqla əlaqəli cinayətlər səbəbindən həbsxanalardakı sıxlığın azaldılması məqsədilə bəzi məhkumların cəzalarını reabilitasiya müəssisələrində çəkməsinə yönəlmiş yanaşmanı dəstəklədiklərini bildirib.

San Patrignano və oxşar icmalarda olan gənclərin çətin bir sağalma prosesindən keçdiyini bildirən Tajani, bu prosesdə mərkəz əməkdaşlarının davamlı dəstəyinin əhəmiyyətini vurğulayıb.

Tajani açıqlamasını “Biz onların yanındayıq. Biz həyatın və azadlığın yanındayıq” mesajı ilə tamamlayıb.