Azərbaycan News Agency

İsrailin Baş naziri Benyamin Netanyahu ABŞ Prezidenti Donald Trampın ona dəstəyini ifadə etdiyi mesajı paylaşıb. Tramp israillilərə müraciətində Netanyahu ilə münasibətlərinin yaxşı olduğunu və birlikdə uğurlar əldə etdiklərini bildirib.

Venesuelaya hücuma, eləcə də “Gecəyarısı Çəkici” və “Epik Qəzəb” əməliyyatlarına toxunan Tramp İranın artıq dəniz və hava qüvvələrinin qalmadığını, ordusunun və iqtisadiyyatının ağır zərbələr aldığını iddia edib. O, həmçinin İranda inflyasiyanın 301 faiz olduğunu irəli sürüb.

İsrail və ABŞ-nin müvafiq olaraq “kiçik şeytan” və “böyük şeytan” adlandırıldığını qeyd edən Tramp “Amerikaya ölüm, İsrailə ölüm” şüarlarının artıq dünyada eşidilməməli olduğunu bildirib.

Tramp mesajının sonunda israillilərə müraciət edərək Netanyahunu “fövqəladə döyüşçü Baş nazir” adlandırıb və seçiciləri ona səs verməyə çağırıb.