Azərbaycan News Agency

2009-cu ilə aid və “təhlükə müəyyənləşdirməsi” (endangerment finding) adlandırılan qərar bir sıra istixana qazlarının ictimai sağlamlıq üçün təhdid yaratdığı qənaətinə gəlmişdi. Bu qərar xüsusilə nəqliyyat vasitələrinin emissiyalarının tənzimlənməsi üzrə federal səylərin hüquqi əsasını təşkil edirdi.

Ağ Ev bu addımı “Amerika tarixində ən böyük derequlyasiya” adlandıraraq, avtomobillərin ucuzlaşacağını və avtomobil istehsalçıları üçün hər avtomobilə görə 2.400 dollar xərc azalması yaradacağını bildirdi.

Ətraf mühit təşkilatları bu addımın iqlim dəyişikliyi ilə mübarizədə indiyədək atılmış ən böyük geri addım olduğunu və məhkəmələrdə etiraz edəcəklərini deyirlər.

Tramp cümə axşamı Oval kabinetdə çıxış edərək 2009-cu il qərarının “Amerika avtomobil sənayesinə ciddi zərər vuran və amerikalı istehlakçılar üçün qiymətləri əhəmiyyətli dərəcədə artıran fəlakətli Obama dövrü siyasəti” olduğunu söylədi.

Respublikaçı prezident Demokratların iqlim gündəmi barədə əlavə etdi: “Bu radikal qayda tarixdəki ən böyük fırıldaqlardan biri olan ‘Yaşıl Yeni Fırıldaq’ın hüquqi əsasına çevrildi.”

Fəaliyyətdə olan prezidentlərin siyasəti barədə nadir hallarda şərh verən keçmiş Prezident Barak Obama bu qərarın ləğvinin amerikalıları daha həssas vəziyyətə salacağını bildirdi.

O, X platformasında yazıb: “Bu olmadan biz daha az təhlükəsiz, daha az sağlam və iqlim dəyişikliyi ilə mübarizə aparmaqda daha az bacarıqlı olacağıq — bütün bunlar isə fosil yanacaq sənayesinin daha çox pul qazanması üçün ediləcək.”