Azərbaycan News Agency

Estoniyanın xarici işlər naziri Margus Tsahkna avqustun 14-dən 15-nə keçən gecə Tallində Milrem Robotics obyektlərinə qarşı törədilən yanğın hücumu ilə bağlı açıqlama verib.

Tsahkna Estoniya Daxili Təhlükəsizlik Xidmətinin topladığı məlumatlara əsasən hücumun Rusiya Federasiyasının xüsusi xidmət orqanlarının tapşırığı ilə həyata keçirildiyi qənaətinə gəldiklərini bildirərək, “Avqustun 14-dən 15-nə keçən gecə Tallində Milrem Robotics obyektlərində baş verən yanğın hücumunun Rusiya Federasiyasının xüsusi xidmət orqanlarının tapşırığı ilə həyata keçirilən sabotaj olduğuna qəti şəkildə qənaət edə bilərik” deyib.

Tsahkna bu cür əməllərin qətiyyən qəbuledilməz olduğunu bildirib və Estoniya Xarici İşlər Nazirliyinin Rusiyanın müvəqqəti işlər vəkilini çağıracağını açıqlayıb.

Hücumun icraçılarının saxlanıldığını və artıq ölkənin milli təhlükəsizliyi üçün təhdid yaratmadığını bildirən Tsahkna, “Estoniya Rusiya üçün bu cür hərəkətləri həyata keçirmək baxımından çətin bir mühitdir, çünki dövlətimizi qorumaq üçün qətiyyətli və sürətli hərəkət edirik” deyib.

Tsahkna sabotaj aktının Rusiyanın Avropa boyunca həyata keçirdiyi daha geniş kampaniyanın bir hissəsi olduğunu irəli sürərək, “Bu sabotaj aktı Rusiyanın bütün Avropada bizi qorxutmaq və Ukraynaya dəstəyimizi zəiflətmək məqsədi daşıyan daha geniş kampaniyasının bir hissəsidir” ifadələrini işlədib.

Tsahkna buna cavab olaraq Estoniyanın Ukraynaya dəstəyini və Rusiyaya təzyiqi artıracağını bildirərək, “Cavabımız bunun tam əksi olacaq. Həm Ukraynaya dəstəyimizi, həm də Rusiyanın təcavüzünə son qoyması üçün ona təzyiqi artıracağıq” deyib.

Tsahkna həmçinin, “Diqqətimizi itirməyək və yolumuza davam edək, çünki Rusiyanın hərəkətləri birlikdə tətbiq etdiyimiz təzyiqin işlədiyinin açıq göstəricisidir” ifadələrini işlədib.