Azərbaycan News Agency

Estoniyanın xarici işlər naziri Margus Tsahkna Rusiyanın Ukraynaya qarşı son hava hücumlarından sonra bəyanat verərək beynəlxalq ictimaiyyəti Rusiyaya təzyiqi artırmağa çağırıb.

Tsahkna bildirib ki, Rusiya ötən gecə Ukraynanın enerji infrastrukturunu hədəf alaraq 39 raket və 120-dən çox pilotsuz uçuş aparatı (PUA) buraxıb. O qeyd edib ki, hücumlar nəticəsində Kiyevdə yaşayış binalarına ziyan dəyib, 5 nəfər həyatını itirib, 20 nəfər isə yaralanıb. Son hücumların Rusiyanın mövqeyini dəyişmək niyyətində olmadığını göstərdiyini vurğulayan Tsahkna deyib:

“Bu hücum bir daha açıq şəkildə xatırladır ki, Rusiya nə öz kursunu dəyişmək, nə də enerji atəşkəsinə əməl etmək niyyətindədir. Əksinə, terror kampaniyasını daha da gücləndirməyə davam edir. Bu hərəkətlər cəzasız qala bilməz.”

Cəzasızlığın heç vaxt seçim ola bilməyəcəyini vurğulayan Estoniyanın xarici işlər naziri Tsahkna diplomatik təcridin, hərəkət məhdudiyyətlərinin və sanksiyaların sərtləşdirilməsinin vacibliyini bildirib. O, dondurulmuş Rusiya aktivlərindən Ukraynanın xeyrinə tam şəkildə istifadə edilməsinə çağırıb və Estoniyanın Ukraynaya dəstəyinin sarsılmaz olaraq davam edəcəyini qeyd edib.