Azərbaycan News Agency

Estoniyanın xarici işlər naziri Marqus Tsahkna Rusiyanın Ukraynanın Kramatorsk şəhərində iki avtobusu hədəf alan hava hücumu ilə bağlı açıqlama verib.

Tsahkna hücum nəticəsində 33 nəfərin həlak olduğunu, azı 18 nəfərin yaralandığını və yaşayış binalarına da ziyan dəydiyini bildirib.

Rusiyanın mülki şəxslərə qarşı hücumlarının artdığını vurğulayan Tsahkna deyib: “Bu il öldürülən və ya yaralanan mülki şəxslərin sayı artıq ötən ilin ümumi göstəricisini keçib”.

Rusiya-Ukrayna müharibəsini qiymətləndirən Tsahkna bildirib: “Heç bir illüziyaya qapılmaq olmaz: Putinin müharibəsi amansız imperialist ambisiyalarla idarə olunur və insan əzabları onu məhdudlaşdırmır”.

Tsahkna əlavə edib: “Heç bir vəhşilik aktı, dağıntının, ağrının və ya terrorun heç bir miqyası onun keçməyəcəyi sərhəd deyil. Cavabdehlik təmin edilməlidir. Cəzasızlıq yalnız daha çox cinayətə təkan verir”.

Tsahkna hücumda həlak olanların və yaralananların ailələrinə, eləcə də hücumdan zərər çəkən hər kəsə başsağlığı və dəstəyini ifadə edib.