Azərbaycan News Agency

BMT-nin İnsan Hüquqları üzrə Ali Komissarı Türk bildirib ki, Tayland və Kamboca arasında düşmənçiliyin genişlənməsi, yaşayış məntəqələrində və onların ətrafında hava zərbələri və ağır silahların istifadəsi mülki əhalinin qorunması ilə bağlı ciddi narahatlıqlar yaradır.

Döyüşlərin dərhal dayandırılmasına çağıran Türk deyib: “Kəndlərin və mədəni obyektlərin ətrafındakı ərazilərin döyüş təyyarələri, pilotsuz uçuş aparatları və artilleriya atəşi ilə vurulması barədə xəbərlər məni narahat edir. Beynəlxalq humanitar hüquqa əsasən, mülki şəxslərin və mülki infrastrukturun qorunmasının son dərəcə vacib olduğu açıq-aydındır.”

Türk bildirib ki, dekabrın 7-də toqquşmaların yenidən başlamasından bəri Kambocada 18 mülki şəxs, Taylandda isə bir mülki şəxs həlak olub və hücumların getdikcə sərhəddən daha uzaqlarda, bir-birinin ərazilərində baş verdiyini qeyd edib.

O, müxtəlif millətlərdən olan insan alveri qurbanlarının Kamboca da daxil olmaqla Cənub-Şərqi Asiyada yerləşən dələduzluq mərkəzlərində fırıldaqçılığa məcbur edildiyini və indi toqquşmalar səbəbindən daha böyük risk altında olduqlarını vurğulayaraq, orada saxlanılanların təxliyəsinə çağırıb.

Türk toqquşmaların sərhəd bölgələrində yaşayan təxminən 750 min nəfərin evlərini tərk etməsinə səbəb olduğunu bildirərək deyib: “Mülki əhalinin təhlükəsizliyini təmin etmək və onların evlərinə təhlükəsiz şəkildə qayıtmasını mümkün etmək həyati əhəmiyyət daşıyır.”

Türk həmçinin Kamboca və Taylanda piyada əleyhinə minaların istifadəsini qadağan edən Ottava Konvensiyası çərçivəsindəki öhdəliklərini xatırladıb.