Azərbaycan News Agency

Ukrayna Xarici İşlər Nazirliyi Rusiyanın gecə boyunca Ukraynaya qarşı həyata keçirdiyi yeni hücum dalğası nəticəsində azı 2 mülki şəxsin həyatını itirdiyini, 34 nəfərin yaralandığını açıqlayıb.

Nazirliyin açıqlamasına əsasən, paytaxt Kiyevdə 4-ü uşaq olmaqla 22 nəfər yaralanıb, 1 nəfər həyatını itirib. Hücumlar nəticəsində yaşayış binalarına, enerji və nəqliyyat infrastrukturuna, müəssisələrə və bir monastıra ziyan dəydiyi bildirilib.

Xarkov bölgəsinə təşkil edilən Rusiya hücumunda 1 nəfərin öldüyü, yaşayış binalarının, bir ofis binasının və səhiyyə müəssisəsinin zərər gördüyü qeyd edilib. Poltava bölgəsində isə özəl yayım təşkilatının hədəfə alındığı bildirilib.

Ukrayna Xarici İşlər Nazirliyi hücumların ölkənin ümumilikdə 12 bölgəsinə təsir etdiyini və enerji infrastrukturunun da hədəfə alındığını açıqlayıb.

Açıqlamada Moskvanın diplomatik təşəbbüslərə mülki şəxslərə qarşı yeni hücumlarla cavab verdiyi iddia olunaraq Ukraynanın daha güclü hava hücumundan müdafiə sistemlərinə, raketlərin daha sürətli çatdırılmasına və Rusiyaya qarşı təzyiqin artırılmasına ehtiyac duyduğu vurğulanıb.