Azərbaycan News Agency

Almaniyanın xarici işlər naziri Yohann Vadeful Ukraynada müharibənin davam etdiyini bildirərək, Almaniyanın Ukraynaya dəstəyini davam etdirəcəyini açıqlayıb.

Vadeful Ukrayna Xarici İşlər Nazirliyində verdiyi açıqlamada Rusiyanın hücumlarının səngimədiyini, əksinə Ukraynanın raket və pilotsuz uçuş aparatlarının hücumlarına intensiv şəkildə məruz qaldığını bildirib. Rusiyanın mülki əhalini və mülki infrastrukturu da hədəfə aldığını qeyd edən Vadeful müharibənin Ukrayna üçün ağır nəticələrinə diqqət çəkib.

Vadeful iyul ayının müharibənin başlanmasından bəri Ukrayna üçün ən ölümcül ay olduğunu bildirib.

Müharibədə həlak olan və zərər çəkən insanların yalnız rəqəmlərdən ibarət olmadığını vurğulayan Vadeful deyib: “Rəqəmlərin arxasında insanlar var: valideynlər, uşaqlar, bacı-qardaşlar, dostlar”.

Almaniyanın Ukrayna xalqının yanında qətiyyətlə dayandığını bildirən Vadeful qış aylarının ehtiyaclarını da nəzərə alaraq humanitar yardım üçün əlavə 50 milyon avro vəsait ayıracaqlarını açıqlayıb.

Vadeful Ukraynanın hava hücumundan müdafiə sistemlərinə ehtiyacının xüsusilə təcili olaraq qaldığını bildirərək, Almaniyanın bu sahədə dəstəyini davam etdirəcəyini söyləyib.

Vadeful həmçinin Almaniyanın Ukraynaya əlavə hava hücumundan müdafiə sistemləri verilməsi üçün tərəfdaşlarını inandırmağa çalışdığını bildirib.

Ukraynanın döyüş meydanındakı təcrübəsindən öyrənməyə davam etdiklərini qeyd edən Vadeful iki ölkənin birgə pilotsuz uçuş aparatları sistemləri və ballistik raketlərə qarşı müdafiə sistemləri hazırladığını bildirib.

Almaniya ilə Ukrayna arasındakı tərəfdaşlığın hər iki ölkəni daha güclü və təhlükəsiz etdiyini bildirən Vadeful Ukraynanın Avropadakı mövqeyini də vurğulayıb.

Vadeful “Ukrayna bizim Avropa ailəmizin bir hissəsidir və Avropa İttifaqının üzvüdür” deyərək Almaniyanın Ukraynanın Avropa ilə inteqrasiyasına dəstəyini bir daha təsdiqləyib.