Azərbaycan News Agency

Ukrayna Prezidenti Volodimir Zelenski Rusiyanın gecə və səhər saatlarında ölkənin müxtəlif bölgələrinə həyata keçirdiyi hücumlarla bağlı açıqlama verib. Zelenski hücumlar nəticəsində 3 nəfərin öldüyünü, ən azı 20 nəfərin yaralandığını bildirib.

Zelenski fövqəladə hallar qruplarının hücumlardan zərər çəkən bölgələrdə işlərini davam etdirdiyini bildirib. Kiyevdə baş verən yanğınların sürətlə söndürüldüyünü deyən Zelenski şəhərdə və ətrafında 6 nəfərin yaralandığını açıqlayıb.

Zelenski Kremençuk və Kriviy Rihin ballistik raketlərlə hədəf alındığını bildirib. O, Kriviy Rihdə 2 nəfərin öldüyünü, 14 nəfərin yaralandığını, Sumıda isə 1 nəfərin həyatını itirdiyini qeyd edib.

Zelenski həftə ərzində Ukraynanın 13 bölgəsinin hücuma məruz qaldığını bildirərək, Rusiyanın şəhər və yaşayış məntəqələrinə hücumlarının nəticələrini açıqlayıb.

Buna əsasən, Rusiya qüvvələri həftə ərzində Ukraynaya 1 550-dən çox hücum dronu, təxminən 1 560 idarə olunan aviabomba və 62 raket buraxıb. Zelenski raketlərin əksəriyyətinin müxtəlif növ ballistik raketlər olduğunu deyib.

Zelenski Ukraynanın bir çox bölgəsində hava hücumu xəbərdarlıqlarının davam etdiyini bildirib və Rusiyanın yeni pilotsuz uçuş aparatı hücumları dalğasına başladığını qeyd edib.

Zelenski hücumlardan sonra hadisə yerlərinə ilk çatan Dövlət Fövqəladə Hallar Xidmətinin əməkdaşlarına, polisə və tibb işçilərinə təşəkkür edib.

Bu qrupların yaralılara yardım etdiyini, insanların həyatını xilas etmək və hücumlardan sonra normal həyata sürətlə qayıdışı təmin etmək üçün çalışdığını bildirən Zelenski Ukraynanın hava hücumundan müdafiəsinin gücləndirilməli olduğunu vurğulayıb.

Zelenski Şimali Koreya ballistik raketlərinin Avropada infrastrukturu dağıtdığını və insan tələfatına səbəb olduğunu iddia edərək, Avropanın hava hücumundan müdafiə imkanlarının anbarlarda saxlanılmamalı olduğunu bildirib.

Zelenski “Həyatlar qorunmalıdır. Rusiya dayandırılmalıdır” deyərək, Ukraynaya dəstək verən ölkələrə təşəkkür edib və yeni dəstək paketlərinin hər gün insanların həyatının xilas edilməsi və infrastrukturun qorunması demək olduğunu bildirib.